8 de Março de 2007
Dia Internacional das Mulheres

ELEGE: COMPARTIR OU DISCRIMINAR

As mulheres temos um papel importantíssimo na economia. Realizamos a maioria do trabalho que supom o cuidado e a reproduçom humana. Este trabalho silenciado no ámbito económico, chegaria a representar entre um 15 e um 20% do PIB (Produto Interior Bruto). Um trabalho que é a base do resto da produçom económica e que permite, ao nom estar valorado, a acumulaçom e o ganho capitalista. Ademais, outorgar-nos a exclusividade nas responsabilidades domésticas, serviu de escusa ao longo dos tempos, para contemplar a inclusom das mulheres no mundo laboral como algo temporal ou complementário do seu trabalho natural no fogar. Isso provocou e segue mantendo, as diferências salariais, a maior presência feminina em setores laborais precarizados e na economia submergida.

Se calculáramos a quantidade de bens e serviços que umha sociedade teria que gerar para cobrir o trabalho da reproduçom e o cuidado humano veríamos que se trata dum trabalho impagável. Compartilhar esse trabalho é a única opçom para que deixe de ser discriminatório para as mulheres.

Trata-se dumha eleiçom simples: compartilhar ou discriminar. Nom se trata só dumha eleiçom individual que afecta as pessoas que convivem juntas ou tenhem responsabilidades familiares, trata-se dumha eleiçom que abrangue também as estruturas económicas, sociais e políticas. Eleger entre compartilhar ou discriminar, significa esquecer a acumulaçom de benefícios e capital a costa de condiçons laborais que nom permitem nem aos homens nem às mulheres, a conciliaçom da vida laboral e familiar. Significa eleger políticas que invistam e afortalem no sector público, redes assistenciais e serviços que ajudem a essa conciliaçom. Significa eleger modelos sociais (educacionais, religiosos, de lecer, afectivos, sexuais, políticos...) de igualdade. O feminismo coloca assim, a toda a sociedade numha encruzilhada onde só se podem seguir duas direcçons, a do cámbio social que permita compartilhar o trabalho que sustenta a existência da Humanidade, ou o caminho da perpetuaçom da discriminaçom das mulheres, onde a violência e a pobreza coexistem co gasto sem medida, a ostentaçom e a depredaçom do planeta.

CONVOCATÓRIAS:

- Cee, às 20:00 hrs, na Praça 8 de Março.

- Compostela, às 20:00 hrs, na Praça 8 de Março.

- Corunha, às 20:30 hrs no Obelisco.

- Ferrol, às 20:00 hrs, no Cantom.

- Ponte Vedra, às 20:30 hrs, na Praça 8 de Março.

- Vigo, às 20:00 hrs, na Praça de Portugal.