MarchaMundialdasMulleresnaGaliza

Hoxe, a 30 de Xuño de 2010, por volta de 500 mulleres de 22 países e territorios da Europa xuntáronse en Istambul, Turquía, como punto de encontro Europeo da III Acción Internacional da Marcha Mundial das Mulleres. Vindo a Istambul expresamos a nosa solidariedade coas mulleres Kurdas e Turcas e a súa loita polos dereitos das mulleres e o dereito a autodeterminación das persoas. Nós manifestamos desta maneira a nosa idea dunha Europa secular, aberta e democrática onde todas as mulleres podan desfrutar e beneficiarse dos mesmos privilexios como cidadás de pleno dereito.

O noso encontro é o resultado do traballo previo que se fixo en diferentes países, como foi a construción da rede de mulleres dos Balcáns, e diversos encontros nacionais para preparar este evento.

Encontrámonos nun momento en que os gobernos e as institucións internacionais están a utilizar a crise económica e financeira para atacar os dereitos das mulleres e os logros dos movementos sociais dos últimos 50 anos.

Opoñémonos e denunciamos estas medidas e loitamos contra o empeoramento das condicións laborais e previsión das pensións. Loitamos contra a privatización e recortes de orzamento para os servizos públicos e pedimos, que no seu lugar, se reduza en gastos militares . Rebelámonos contra o avanzo da extrema dereita, os fundamentalismos e militarismos así como a criminalización dos movementos sociais e o uso da violencia contra as mulleres para reprimir e facer desaparecer estes movementos. Opoñémonos ao acoso sexual, especialmente contra as mulleres kurdas e as súas crianzas, consecuencia das políticas de Estado así como a todo tipo de violencia que este exerce contra as mulleres activistas. Unímonos ás mulleres das nacións oprimidas que continúan a loitar contra a explotación clasista, sexista e de nacionalismo de Estado.

Xuntas como un movemento feminista internacional de mulleres de base continuaremos a loita organizándonos e participando en futuras mobilizacións como:

- a nosa acción internacional pola paz e desarme na República Democrática do Congo en Outubro de 2010

- a observación do xuízo contra 151 políticas, alcaldesas e defensoras dos dereitos das mulleres kurdas e activistas sindicais en Diarbakyr en Outubro de 2010

- as Euromarchas contra a precariedade e desemprego en Bruxelas en Outubro de 2010.

- o contra-cumio da OTAN en Portugal en Novembro de 2010.

- a manifestación da Confederación Sindical Europea en Setembro de 2010

- a construción do foro Europeo de soberanía alimentar en Austria en 2011

Facemos un chamamento aos movementos sociais para conectar coas múltiples loitas que están a ter lugar localmente e unirse a elas a nivel continental, como nós estamos a facer na Marcha Mundial das Mulleres. Agora é o momento para se unir a estas loitas para así vencer ao capitalismo, patriarcado e racismo.