Desde o pasado mes de abril centos de persoas levaban acampando diante do Governo Civil do Estado de Oaxaca esixindo xustiza para as comunidades indíxenas. Entre outros motivos, a medida quería denunciar os ataques paramilitares a estas comunidades. O pasado 14 de setembro ás seis da mañán as persoas acampadas foron desaloxadas nunha acción na que a policia utilizou gases lacrimóxenos e bombas aturdidoras. Catorce persoas foron levadas a prisión, das cales sete sairon nos seguintes días tras o pago de fianzas. A Comisión Interamericana de Direitos Humanos está xa informada dos feitos.

Entre as persoas que continuan en prisión e incomunicadas atópase Dolores Villalobos, do Consello Indíxena Popular de Oaxaca. Precisamente esta muller visitou recentemente Galicia, dentro dunha xira polo Estado, na que deu a coñecer a problemática que os levou a acampar permanentemente diante do Governo Civil. Entre as súas reivindicacións, o desmantelamento dos grupos paramilitares mexicanos, a solución aos conflitos agrarios, o cumprimentos de compromisos como auga, luz e escolas nas comunidades e a paralización dos procesos penais contra integrantes do CIPO. Na súa viaxe, Dolores Villalobos participou activamente na multitudinaria mobilización europea da Marcha Mundial das Mulleres, celebrada en Vigo o 22 de maio deste ano.

O grupo de apoio constituído en Vigo inmediatamente despois das detencións leva xa dúas semanas desenvolvendo unha campaña de recollida de sinaturas e fondos para conseguir a liberación dos indíxenas. O seu obxectivo é sensibilizar á povoación galega e dar a coñecer unha loita pacífica, a indíxena en México, que está ser reprimida con violencia e cárcere. Neste caso, segundo os seus integrantes, vense especialmente motivados ao ter convivido estreitamente con Dolores Villalobos na súa recente visita a Galicia e coñecer de primeira man a situación que se vive nas comunidades indíxenas.

Pódese obter máis información en: http://www.nodo50.org/cipo/home.htm